महाराष्ट्र हेडलाईन्स :  समृद्धी महामार्ग हा सरकारचा मोठा प्रोजेक्ट आहे, कमी वेळामध्ये लांबचा प्रवास या महामार्गामुळे सोप्पा होतोय. आता त्याच धर्तीवर महाराष्ट्राला आणखी एक नवीन महामार्गाची भेट मिळणार आहे. नागपूर ते गोवा दरम्यान हा नवा महामार्ग तयार करण्यात येणार असून त्याला शक्तीपीठ महामार्ग असे नाव देण्यात आले आहे. राज्य रस्ते विकास महामंडळाकडून हा महामार्ग तयार केला जाणार आहे. विशेष म्हणजे हा महामार्ग राज्यातील तीन शक्तीपीठांना कनेक्ट करणार आहे. ८०२ किलोमीटर लांबीचा शक्तीपीठ महामार्ग असून सध्या राज्यात भुसंपादनाच्या प्रक्रियेला सुरूवात झाली आहे. दरम्यान, राज्यात सर्व ठिकाणी शेतकरी भुसंपादनासाठी विरोध करत असल्याचे चित्र आहे. (This new highway will be built between Nagpur and Goa and has been named Shaktipeeth Highway.)

लोकसभा निवडणूकीत महायुतीच्या नेत्यांना शक्तिपीठ महामार्ग प्रकल्पामुळे मोठा फटका बसला होता. त्यामुळे गेल्यावर्षीच्या विधानसभा निवडणूकीत शक्तिपीठ महामार्ग प्रकल्पाच्या भूसंपादनाला स्थगिती देण्यात आली होती.

मात्र, विधानसभा निवडणूकीत महायुतीला भरघोस यश मिळाल्यानंतर सरकारचा सुर बदलला आणि  शक्तिपीठ महामार्ग करण्याचा निर्णय घेण्यात आला. निधीलाही मंजूरी देण्यात आली. दरम्यान, शक्तीपीठाला विरोध दर्शवत शेतक-यांनी शासनाच्या आद्यादेशाची राज्यात ठिकठिकाणी होळी केली. आंदोलन, मोर्चा काढला. परंतू, सरकार आपल्या निर्णयावर ठाम असल्याचे चित्र आहे.

 ३,८७७ शेतकऱ्यांची जमीन संपादित केली जाणार :

सांगली जिल्ह्यातील गावांमध्ये मोजणीची प्रक्रिया देखील सुरू करण्यात आली आहे. ही मोजणी प्रक्रिया गेल्या महिन्यापासून सुरू झाली आहे. जून महिन्याच्या शेवटच्या आठवड्यात या महामार्ग प्रकल्पासाठी मोजणी प्रक्रिया सुरू करण्यात आली. पण, मोजणी प्रक्रिया सुरू झाल्यानंतर जिल्ह्यातील आटपाडी तालुक्यातील शेटफळे आणि कवठेमहांकाळ तालुक्यातील तिसंगी, घाटनांद्रे या गावांमध्ये मोजणीवेळी शेतकऱ्यांनी जोरदार विरोध सुद्धा दर्शविला. असे असतानाही ७ जुलै २०२५ पासून जिल्ह्यातील तासगाव तालुक्यातील गावांमध्ये मोजणीस प्रारंभ होणार आहे. शक्तीपीठ महामार्ग प्रकल्पासाठी सांगली जिल्ह्यातील तासगाव तालुक्याच्या १० गावांतील ३,८७७ शेतकऱ्यांची जमीन संपादित केली जाणार आहे. या संबंधित शेतकऱ्यांच्या ५५३ गटातील ३७३.१३५ हेक्टर जमीन संपादित केली जाणार अशी माहिती प्राधिकरणाकडून समोर आली आहे. मात्र, तालुक्यातील शेतकऱ्यांनी सुरुवातीपासूनच बागायती शेती जाणार असल्याच्या कारणावरून या प्रकल्पास तीव्र विरोध दर्शविला आहे. तिच परिस्थ‍िती नांदेड जिल्हयातील आहे.

बहिणीचे दिड हजार परत घ्या पण, जमीन देणार नाही : 

शक्तिपीठ महामार्गाची मोजणी करण्यासाठी आलेल्या अधिकाऱ्यांना शेतकरी महिलांच्या आक्रमकतेपुढे  माघारी फिरावे लागले. नांदेड जिल्ह्यातील देगाव (ता. अर्धापूर) मध्ये मोजणी करण्यासाठी ७ जुलैला मोठया पोलीस बंदोबस्तात अधिकारी आले होते. मात्र, शेतकरी महिलांचा रोष पाहून अधिकाऱ्यांनी काढता पाय घ्यावा लागला. 

अर्धापूर तालुक्यातील काही गावांची जमीन शक्तिपीठ महामार्गात बाधित होणार आहे. मोजणीसाठी आलेल्या अधिकाऱ्यांना कोणत्याच गावात आतापर्यंत मोजणी करता आली नाही. देगावमध्ये  ७ जुलैला अधिकारी पोलीस बंदोबस्तात आले. आम्हाला गोळ्या घाला मग, मोजणी करा, असा पवित्रा महिलांनी घेतला. ह्या जमिनीवर तीन पिढ्याचा उदरनिर्वाह चालतो, जमीन गेली तर खायचे काय? असा सवाल महिलांनी उपास्थित केला. लाडक्या बहिणीचे दिड हजार परत घ्या पण जमीन देणार नाही, असा सूर शेतकरी महिलांमधून यावेळी उमटत होता. यावेळी देगाव कुर्‍हाडा, मालेगाव, धामदरी, उमरी येथील शेतकरी मोठ्या संख्येने सहभागी झाले होते.