महाराष्ट्र हेडलाईन : IAS officer Rupal Rana Success Story : आयएएस होण्याचे स्वप्न उराशी घट्ट करुन अखंड अभ्यास करुन मेहनत घेणारे विद्यार्थी आहेत. पण हे यश सर्वांनाच मिळत नाही. हे खरे असले तरी उत्तर प्रदेशातील रुपल राणा यांनी यूपीएससी परीक्षेत २६ वी रँक मिळवून आयएएस अधिकारी बनण्याचे स्वप्न पूर्ण केले आहे. लहानपणी आईचे छत्र हरपल्यानंतरही त्यांनी हार मानली नाही. वडिलांच्या पाठिंब्याने आणि अथक परिश्रमाने त्यांनी हे यश संपादन केले. त्यांचे हे यश इतरांसाठी प्रेरणादायी ठरत आहे.
रुपल राणा उत्तर प्रदेशातील बागपत जिल्ह्यातील रहिवासी आहेत. त्यांनी आपली सुरुवातीची शाळा जेपी पब्लिक स्कूल, बागपत येथून पूर्ण केली. दहावीत त्यांनी चांगला अभ्यास करून उत्कृष्ट प्रदर्शन केले. त्यानंतर त्यांनी पिलानी इन्स्टिट्यूट ऑफ टेक्नॉलॉजीमधून अकरावी आणि बारावीचे शिक्षण घेतले. उच्च शिक्षणासाठी त्यांनी दिल्ली विद्यापीठातील देशबंधू कॉलेजमधून पदवी प्राप्त केली, जिथे त्या विद्यापीठाच्या टॉपर ठरल्या आहेत.
लहान वयातच आईचे छत्र हरवले :
रुपल राणा यांनी अगदी लहान वयातच आपल्या आईला गमावले. हा त्यांच्या आयुष्यातील एक मोठा आघात होता, परंतु त्यांनी खचून न जाता पुढे जाण्याचा निश्चय केला. त्यांचे वडील जसवीर राणा, जे दिल्ली पोलिसात सहाय्यक उपनिरीक्षक म्हणून कार्यरत होते, आणि त्यांच्या भावंडांनी त्यांना नेहमीच प्रोत्साहन दिले. कुटुंबाच्या सहकार्याने आणि स्वतःच्या दृढ निश्चयाने रुपल यांनी आपले शिक्षण सुरू ठेवले.
सुरुवातीला अपयश पण अखेर विजय :
युपीएससी (UPSC) परीक्षेच्या तयारीमध्ये अपयशी होणे ही सामान्य बाब आहे. रुपल राणा यांनाही पहिल्या दोन प्रयत्नांमध्ये यश मिळाले नाही. मात्र, त्यांनी हार मानण्याऐवजी अधिक मेहनत केली. तिसऱ्या प्रयत्नात त्यांनी २६ वी रँक मिळवून IAS अधिकारी बनण्याचे आपले स्वप्न साकार केले.
