महाराष्ट्र हेडलाईन : AI syllabus Artificial Intelligence : कृत्रिम बुद्धिमत्ता अर्थात आर्टिफिशियल इंटेलिजेन्स (AI) आजच्या काळातील सर्वात परिवर्तनशील तंत्रज्ञानापैकी एक आहे. हे आपले जीवन, कार्यपद्धती आणि संवाद साधण्याची पद्धत बदलत आहे. एआय हे एकप्रकारे मशीनच्या रुपात मानवाप्रमाणे समस्या सोडवणे, निर्णय क्षमता, तर्कसंगतता व नवीन गोष्टी शिकण्याचे काम करते. आज प्रत्येक क्षेत्रात 'एआय' चा वापर केला जात आहे. याचे महत्त्व लक्षात घेऊन देशातील सर्व शाळांमध्ये तिसरीपासून कृत्रिम बुद्धिमत्ता (एआय) आणि संगणकीय अभ्यासक्रम शिकवला जाणार (Artificial Intelligence (AI) and computing courses will be taught in all schools in the country from class 3 onwards. )आहे. यासाठी डिसेंबर २०२५ पर्यंत अभ्यासक्रमाचे साहित्य, हँडबुक आणि डिजिटल संसाधने तयार केली जाणार आहेत. एआय आणि संगणकीय अभ्यासक्रम शिकवण्यासाठी शिक्षकांना विशेष प्रशिक्षणही दिले जाणार असल्याची माहिती केंद्रीय शिक्षण मंत्रालयाने दिली.

राष्ट्रीय शालेय शिक्षण आराखडा ... 

राष्ट्रीय शालेय शिक्षण आराखडा २०२३ नुसार अर्थपूर्ण आणि समावेशक अभ्यासक्रम तयार करण्यासाठी सर्व राज्ये आणि केंद्रशासित प्रदेशांसह सीबीएसई, एनसीईआरटी, केव्हीएस आणि एनव्हीएससारख्या संस्थांना केंद्रीय शिक्षण मंत्रालय सहकार्य करत आहे.

तज्ज्ञ समिती करण्यात आली स्थापन... 

यासाठीचा अभ्यासक्रम सुरू करण्याच्या तयारीसाठी २९ ऑक्टोबर २०२५ रोजी केंद्रीय शालेय शिक्षण विभागाच्या सचिवांनी बैठक घेण्यात आली. यावेळी सीबीएसई, एनसीईआरटी, केव्हीएस, एनव्हीएस आणि इतर तज्ज्ञ उपस्थित होते. दरम्यान, केंद्रीय माध्यमिक शिक्षण मंडळाने (सीबीएसई) एआय आणि सीटी अभ्यासक्रम विकसित करण्यासाठी आयआयटी मद्रासचे प्रा. कार्तिक रमण यांच्या अध्यक्षतेखाली एक तज्ज्ञ समिती स्थापन केली आहे.

एआयचा वापर वाढवण्याचा उद्देश... 

कृत्रिम बुद्धिमत्ता आणि संगणकीय ज्ञान प्रशिक्षणाच्या माध्यमातून हळूहळू सार्वजनिक हितासाठी एआयचा वापर वाढवण्याचा उद्देश या संकल्पनेमागे आहे. शिवाय एआयमधील गुंतागुंतीच्या आव्हानांचे निराकरण करण्यासाठी तसेच एआयच्या नैतिक वापराच्या दिशेने टाकलेले एक नवीन परंतु महत्त्वपूर्ण पाऊल आहे. कारण या तंत्रज्ञान प्रशिक्षणाची सुरुवात इयत्ता तिसरीपासून होईल, असे शिक्षण मंत्रालयाने म्हटले.

कला, साहित्य आणि मीडिया क्षेत्रात नवीन संधी... 

कृत्रिम बुद्धिमत्ता (AI) आजच्या डिजिटल युगात एक अत्यंत महत्वाचे तंत्रज्ञान बनले आहे, जे विविध उद्योगांमध्ये क्रांतिकारी बदल घडवून आणत आहे. एआयच्या वापरामुळे जीवनशैली, कामकाजाची पद्धत, तसेच विविध क्षेत्रांमध्ये कार्यक्षमता आणि नाविन्यतेत मोठ्या प्रमाणावर सुधारणा झाली आहे. आरोग्यसेवा, वित्त, वाहतूक आणि उत्पादन क्षेत्रांमध्ये एआयने कार्यक्षमतेत वाढ केली आहे, तर जनरेटिव्ह एआयसारख्या तंत्रज्ञानांनी कला, साहित्य आणि मीडिया क्षेत्रात नवीन संधी निर्माण केल्या आहेत.