चैतन्य नगर परिसरातील नागरिक त्रस्त ; तक्रार करूनही मनपाचे दुर्लक्ष 

महाराष्ट्र हेडलाईन्स :  Stray, battered dogs roam : शहरात पिसाळलेल्या कुत्र्यांनी उच्छाद मांडला आहे. विशेषत: चैतन्य नगर, श्रीनाथ नगर, सहयाद्री नगर, साई मंदिर परिसर पिसाळलेल्या कुत्र्यांनी उच्छाद मांडला आहे. नागरिकांना चावा घेण्यासोबतच दुचाकी वाहनांवरील सिट कव्हर फाडून नुकसान करत आहेत. परिसरात भितीचे वातावरण निर्माण झाले आहे. नागरिकांनी महापालिकेत तक्रार करून ही प्रशासनाने याकडे दुर्लक्ष केले आहे. (Stray, battered dogs roam; car seat covers torn and damaged)

नांदेड शहरात भटक्या कुत्र्यांच्या संख्येत लक्षणीय वाढ झाली आहे. कुत्र्याने चावा घेण्याच्या प्रकारातही तितक्याच पटीने वाढ होत आहे. शहरासह उपनगरात कुत्र्यांचे कळपच्या कळप तयार झाले आहेत. चैतन्य नगर परिसर हा वर्दळीचा व उच्चभ्रु वस्ती असलेला आहे. या परिसरात येणाऱ्या श्रीनाथ नगर, सहयाद्री नगर, साई मंदिर भागात कुत्र्यांची टोळी आहे. नगरातून जाताना पादचारी व वाहनांचा पाठलाग करतात. अंगावर चवताळून येतात. यामुळे नागरिकांसह वृध्द तसेच लहान मुले व महिलांच्या जीवितास धोका निर्माण झाला आहे. घरासमोर, पार्किंगमधील गाड्यांचे सिट कव्हर फाडून नुकसान करत आहेत. या भागात सकाळी व सायंकाळच्या वेळी पायी फिरायला येणाऱ्यांची संख्या मोठी आहे. त्यामुळे मोकाट व पिसाळलेल्या कुत्र्यांचा बंदोबस्त करावा, अशी लेखी स्वरूपात मागणी परिसरातील नागरिकांनी महापालिकेकडे केली होती. मात्र , मनपा प्रशासनाकडून अद्याप कोणतीही कारवाई करण्यात आली. उलट नागरिकांनी चौकशी केली असता त्यांना टाळाटाळ केली जात आहे, असे सांगण्यात येत आहे. भटक्या कुत्र्याबाबत उपाययोजना करण्यात महापालिका यंत्रणेकडून कोणत्याही प्रकारच्या सक्षम उपाययोजना केल्या जात नाहीत. केवळ कागदोपत्री उपयायोजना दाखवल्या जातात. त्यामुळेच भटक्या कुत्र्याबरोबर आता पिसाळलेल्या कुत्र्यांचाही त्रास सहन करावा लागत असल्याच्या संतप्त प्रतिक्रिया या भागातील नागरीकांमधून व्यक्त होत आहेत.

कोणत्याही वेळी होतो नळाला पाणीपुरवठा :

चैतन्य नगरसह श्रीनाथ नगर, सहयाद्री नगर, साई मंदिर या भागात काही दिवसांपासून नळाला कोणत्याही वेळेत पाणी सोडण्यात येत आहे. रात्री बारा वाजता पाणी सोडले जात आहे. पूर्वी सकाळच्या वेळी पाणी येत होते. मात्र, आता अवेळी नाळाला पाणी सोडण्यात येत असल्याने नागरिकांची चांगलीच तारांबळ उडत आहे. नागरिकांची झोप उडाली असून आरोग्यावर विपरीत परिणाम होत आहे. सकाळच्या वेळेतच नळाला पाणी सोडण्यात यावे, अशी मागणी या भागातील नागरिकांमधून जोर धरत आहे.