महाराष्ट्र हेडलाईन्स : बँड बाजा, गावातून मिरवणूक, फुलांच्या माळा गळ्यात घालून चौका चौकात होणारे स्वागत, भल्ला मोठा मंडप, जेवणावडीच्या पंगती आणि पाहुणेमंडळी, अधिकारी, विद्यार्थी, खूप मोठ्या प्रमाणामध्ये ग्रामस्थांच्या उपस्थितीतीमध्ये सुरू असलेला हा सोहळा म्हणजे एखाद्या लग्नालाही लाजवेल असा.. पण हे लग्न नव्हे तर हे आहे एका आवडते मुख्याध्यापक गुरुजींचा सेवापुर्ती गौरव सोहळ्याचा कार्यक्रम..  (Students and villagers of Daggaon bid emotional farewell to their beloved principal Ashok Raut sir)

लोहा तालुक्यातील दगडगाव येथील जिल्हा परिषद प्राथमिक शाळेत सात वर्षे सेवा दिल्यानंतर मुख्याध्यापक अशोक सोयराजी राऊत यांचा सेवानिवृत्तीचा कार्यक्रम ३० जून रोजी शाळेत पार पडला. विद्यार्थ्यांप्रती त्यांचे असलेले प्रेम आणि निरोप देतेवेळी विद्यार्थ्यांनी आणि ग्रामस्थांनी त्यांना भावूक निरोप दिला. विद्यार्थ्यांच्या डोळयात आश्रू होते, आणि प्लीज सर, आम्हाला सोडून नका जाऊ, " विनंती करत होते.

३९ वर्षाच्या सेवेनंतर मुख्याध्यापक अशोक राऊत गुरुजी हे ३० जून २०२५ रोजी सेवानिवृत्त झाले. ग्रामस्थ, आणि शिक्षकांच्या वतीने दगडगाव येथे त्यांचा सेवापुर्ती गौरव सोहळा आयोजित करण्यात आला होता. 

मुख्याध्यापक राऊत गुरुजी यांचा सपत्नीक सेवागौरव :

यावेळी कार्यक्रमाच्या अध्यक्षस्थानी लोहा गटशिक्षणधिकारी सतीश व्यवहारे हे होते. प्रमुख पाहुणे म्हणून अतिरिक्त मुख्यकार्यकारी अध‍िकारी संदीप माळोदे, शिक्षणाधिकारी (नियोजन) दिलीपकुमार बनसोडे, शिक्षण विस्तार अध‍िकारी सरस्वती आंबलवाड, केंद्रप्रमुख संतोष आंबुलगेकर आदींची उपस्थ‍िती होती. तत्तपूर्वी गावातून वाजत गाजत मिरवणूक काढण्यात आली. यावेळी मुख्याध्यापक अशोक राऊत गुरुजी यांचा ठिकठिकाणी सत्कार करण्यात आला. उपस्थ‍ितांच्या हस्ते मुख्याध्यापक राऊत गुरुजी यांचा सपत्नीक सेवागौरव करण्यात आला. ग्रामसेवक घुमलवाड, सरपंच प्रतिनिधी नवरे, वैशाली कुलकर्णी, शुभांगी राऊत, केंद्रप्रमुख अंबुलगेकर, खंडू नागरगोजे, गटशिक्षणधिकारी व्यवहारे यांनी मनोगत व्यक्त केले. लक्ष्मीकांत तेलंग, भगवान सोनटक्के, उषा गुंटूरकर, गंगा नागरगोजे,  राजेश पारेकर, राजू डोंगरगावकर, विनायक राठोड, वाघजी कस्तुरे यांच्यासह सर्वगावकरी, शाळा समिती सदस्यांनी कार्यक्रमाच्या यशस्वीतेसाठी पुढाकार घेतला. यावेळी इयत्ता सातवी वर्गातील मुलींनी स्वागत गीत सादर केले. कार्यक्रमाचे सुत्रसंचालन शिक्षक गजानन कैलासे यांनी तर, प्रास्ताव‍िक हिराचंद्र कदम यांनी केले.

स्वखर्चातून 350 स्कुल बॅगचे विद्यार्थ्यांना वाटप : 

मुख्याध्यापक राऊत यांनी स्वखर्चातून दगडगाव येथील जिल्हा परिषद शाळेतील विद्यार्थ्यांना साडे तीनशे बॅगचे वाटप केले. यामाध्यमातून त्यांनी एक आदर्श निर्माण केला आहे. 

दगडगाव शाळेचा केला कायापालट :

मुख्याध्यापक राऊत यांनी जिल्हा परिषद शाळा दगडगाव येथे शंभर झाडांचे वृक्षारोपण करत शालेय परिसर हिरवाइने नटलेला आहे. वर्ग खोल्यांची व शाळेची रंगरंगोटी करणे, विद्यार्थ्यांमध्ये खेळाडू वृत्ती निर्माण करणे असो की स्पर्धा परीक्षेसाठी आपला प्रत्येक विद्यार्थी तयार करणे, झोकून देऊन काम करण्याची तयारी सरांची तत्परता वाखाणण्याजोगी असे. आजच्या परिस्थितीमध्ये जिल्हा परिषदेच्या शाळांची पटसंख्या घसरत चालली असताना सरांनी शाळेची पटसंख्या वाढवली, उपस्थिती राखली आणि विद्यार्थ्यांच्या प्रगतीत मोलाची भूमिका पार पडली.