महाराष्ट्र हेडलाईन्स : लोहा आयडीबीआय बँकेचे शाखा व्यवस्थापक आशिष देशमुख (३०) यांची आज (७ जुलै) सोयरीक होणार होती. मात्र, संसार सुख घेण्यापूर्वीच आणि विवाह बंधनात अडकण्यापूर्वीच त्यांच्यावर काळाने घाला घातला. दोन दिवस आधीच त्यांचा अपघातात मृत्यू झाला. त्यामुळे सर्वत्र हळहळ व्यक्त होत आहे. आशिष देशमुख यांना भाऊ नसून दोन बहिणी आहेत. त्यांची आई सुद्धा वृद्धापकाळामुळे आजारी आहे. (The curse of time...! Bank manager dies accidentally two days before Soyri...)

दोन दिवसांपूर्वीच झाले होते रुजू :

निवघा बाजार (ता. हदगाव) येथे कार्यरत असलेले परंतु, नुकतेच लोहा येथे बदली झालेले आयडीबीआय बँकेचे शाखा व्यवस्थापक आशिष देशमुख यांचा शनिवारी (दि.५) रात्री आठ वाजताच्या सुमारास नांदेड - नागपूर राष्ट्रीय महामार्गावरील हदगांव जवळ कवठा शिवारात अज्ञात वाहनाने चिरडल्याने त्यांचा मृत्यू झाला. ते मूळचे वाशिम जिल्ह्यातील लिंगी (ता.रिसोड) या गावचे रहिवासी होते. ते हदगांव येथे राहत होते. लोहा येथे दोन दिवसांपूर्वीच ते रुजू झाले. रविवारी सुट्टीचा दिवस असल्यामुळे  हदगाव येथे असलेला घरपसारा नेण्यासाठी शनिवारी दिवसभर शाखेत काम करून देशमुख लोहा येथून निघाले. हदगावात येताच जेवण करण्याचा त्यांचा बेत होता त्यासाठी त्यांनी निवघा शाखेतील आपल्या पूर्वीच्या एकत्र राहत असलेल्या सहकाऱ्यांना जेवणासाठी डबा आणून ठेवण्याचे सांगितले होते.

दोन वाहने करत होते एकमेकांना ओव्हरटेक :

दरम्यान, प्रत्यक्ष दर्शनी सांगितले की,  हस्तरा येथील काही लोक जेवणासाठी हदगांव जवळ असलेल्या एका शुद्ध शाकाहारी ढाब्यावर येत होते. त्यांच्यापैकी विठ्ठल सोळंके व गजानन सोळंके हे दोघेजण एका मोटरसायकलवर समोर आले होते. आणखी मित्र येत असल्यामुळे त्यांनी आपली मोटरसायकल रस्त्याच्या बाजूला उभी करून थांबले होते. त्याचवेळी हदगावकडे जाणारे आशिष देशमुख तिसऱ्या लेन वरून अर्थात बाईक लेनवरून आपल्या मोटरसायकलवर वेगाने आले. त्यांच्या पाठीमागेच अंदाजे शंभर फूट अंतरावर पण, मुख्य दोन लेनवरून दोन वाहने एकमेकांना ओव्हरटेक करत जात होते. आशिष देशमुख यांना अचानक समोर मोटरसायकल आणि दोन व्यक्ती उभे असलेले दिसले. त्यांनी त्या दोघांना वाचवण्याचा प्रयत्न केला. परंतु थोडा धक्का त्या उभ्या असलेल्या मोटरसायकल आणि तिथे थांबलेल्या दोन व्यक्तींना लागला. त्यामुळे त्यांचे संतुलन बिघडले आणि ते मुख्य महामार्गावर जाऊन कोसळले. दरम्यान पाठीमागून येणाऱ्या दोन्ही मोठ्या वाहनांनी त्यांना चिरडले.

एकाचा पाय फ्रॅक्चर तर, दुसऱ्याला सुद्धा गंभीर दुखापत :

रस्त्याच्या कडेला उभे असलेले दोघेही जण धक्का लागल्यामुळे बाजूला फेकल्या गेले. त्यातील एकाचा पाय फ्रॅक्चर झाला असून दुसऱ्याला सुद्धा गंभीर दुखापत झाली आहे. घटनास्थळा जवळच उपस्थित असलेले कवठा येथील अध्यक्ष दत्तराव जाधव यांनी पोलीसांना माहिती दिली व ॲम्बुलन्सला पाचारण केले. पाऊस सुरू असताना सुद्धा दत्तराव जाधव, पप्पू जाधव, विनोद जाधव, राजेश शिंदे व सुमित चौरे यांनी ईतर लोकांच्या मदतीने मयत आशिष देशमुख यांचा मृतदेह व जखमींना रुग्णालयात नेण्यासाठी मदत केली.