महाराष्ट्र हेडलाईन्स : Social Activities by the Waghmare Couple : प्रशासनातील शिस्तप्रिय अधिकारी, कुटुंबातील प्रेमळ व्यक्तिमत्व असलेले कै. सी. बी. वाघमारे (उमरजकर) यांनी २५ वर्षांपूर्वी जगाचा निरोप घेतला. पण त्यांच्या कुटुंबीयांनी मात्र गेल्या १९ वर्षांपासून शैक्षणिक, सामाजिक उपक्रम राबवून गरजूंना मदत करत वडिलांच्या स्मृती कायम ठेवल्या आहेत. २००६ पासून त्यांच्या कुटुंबीयांनी विविध संस्था, शाळा, गरजूंना शैक्षणिक साहित्य, पुस्तके वितरीत केली. ट्री गार्ड भेट देऊन पर्यावरण संरक्षणासाठीही पुढाकार घेतला. कै. सी. बी. वाघमारे यांनी मुखेड पंचायत समितीमध्ये सांख्यिकी अधिकारी, बिलोली पंचायत समितीत आयसीडीएस अधिकारी व बिलोलीतच प्रभारी गटविकास अधिकारी म्हणून कारर्किद गाजवली. त्यांच्या पश्चात पत्नी, दोन मुले व दोन मुली. दीर्घ सेवेनंतर ते निवृत्त झाले. ११ सप्टेंबर २००० मध्ये त्यांचे निधन झाले. कुटुंबप्रमुख असलेल्या वाघमारे यांच्या स्मृती जपण्यासाठी सामाजिक उपक्रम राबवण्याचा निर्णय पूर्ण कुटुंबाने घेतला.
कै. चुडामन भिवाजी वाघमारे यांच्या २५ व्या पुण्यस्मरण दिनाचे औचित्य साधून त्यांचे सुपुत्र जयप्रकाश वाघमारे आणि त्यांच्या पत्नी सौ. उषा जयप्रकाश वाघमारे- गुंटूरकर यांनी याही वर्षी सामाजिक बांधिलकी जपत विविध उपक्रम राबवले. गेल्या वीस वर्षांपासून हे दांपत्य आपल्या वडिलांच्या स्मृतिप्रीत्यर्थ गरजू विद्यार्थ्यांना आणि सामाजिक संस्थांना मदत करत आहे. त्यांच्या या अविरत योगदानामुळे सर्वत्र त्यांचे कौतुक होत आहे. (Social activities by the Waghmare couple on the occasion of the 25th death anniversary of the late Chudaman Waghmare)
अण्णाभाऊ साठे स्पर्धा परीक्षा केंद्राला पुस्तके भेट :
दिनांक ११ सप्टेंबर २०२५ रोजी नांदेड येथील अण्णाभाऊ साठे स्पर्धा परीक्षा मार्गदर्शन केंद्रात गरजू विद्यार्थ्यांसाठी स्पर्धा परीक्षेची उपयुक्त पुस्तके भेट देण्यात आली. राष्ट्रपती पुरस्कार विजेते आदरणीय शिक्षक शिवा कांबळे यांच्या हस्ते ही पुस्तके केंद्राचे अध्यक्ष डॉ. वाडेकर यांना सुपूर्द करण्यात आली. या वेळी केंद्राचे पदाधिकारी आणि मोठ्या संख्येने विद्यार्थी उपस्थित होते. अभ्यासपूर्ण पुस्तके मिळाल्याने विद्यार्थ्यांमध्ये उत्साहाचे वातावरण होते. केंद्राच्या वतीने या दांपत्याचा विशेष सत्कार करण्यात आला.
दगडगाव जिल्हा परिषद शाळेला पंख्यांची भेट :
दि. 13 सप्टेंबर रोजी, वाघमारे दांपत्याने जिल्हा परिषद शाळा, दगडगाव येथील विद्यार्थ्यांच्या सोयीसाठी पाच पंखे भेट दिले. शाळेतील विद्यार्थ्यांना उन्हाळ्यात दिलासा मिळावा या उद्देशाने त्यांनी हा उपक्रम राबवला. या वेळी शाळेचे मुख्याध्यापक तेलंग, सर्व शिक्षक आणि विद्यार्थी उपस्थित होते. मुख्याध्यापक तेलंग यांनी वाघमारे दांपत्याच्या या कार्याचे कौतुक करून त्यांचे आभार मानले.
वाघमारे (उमरजकर) परिवाराचा गौरव :
गेली दोन दशके सातत्याने समाजातील वंचित घटकांसाठी काम करणाऱ्या वाघमारे (उमरजकर) परिवाराची ही सामाजिक सेवा कौतुकास्पद आहे. अण्णाभाऊ साठे स्पर्धा परीक्षा मार्गदर्शन केंद्राच्या वतीने आणि दगडगाव जिल्हा परिषद शाळेचे मुख्याध्यापक तेलंग यांच्याकडून जयप्रकाश वाघमारे आणि सौ. उषा गुंटूरकर-वाघमारे यांचा त्यांच्या योगदानाबद्दल सत्कार करण्यात आला. या सन्मानाने त्यांच्या कार्याला अधिक बळ मिळाले आहे.
