महाराष्ट्र हेडलाईन्स : navratri ghatasthapana 2025 : महाराष्ट्रातील देवीच्या साडेतीन शक्तिपीठांपैकी पूर्ण पीठ असलेल्या जिल्ह्यातील माहूर गडासह नांदेड शहरापासून जवळ असलेल्या वडेपुरी रत्नेश्वरी, जुन्या शहरातील गाडीपुरा, वामन नगरची रेणुकामाता देवी मंदीरासह घरोघरी, सार्वजनिक दुर्गा मंडळांमध्ये सोमवारी (दि.२२) 'आई राजा उदो...उदो' च्या गजरात घटस्थापनेने शारदीय नवरात्रोत्सवाला प्रारंभ झाला. पहिल्याच दिवशी भाविकांची दर्शनासाठी देवी मंदिरामध्ये गर्दी केली होती. यावेळी पोलिसांकडून बंदोबस्त ठेवण्यात आला होता. (Navratri festival begins with the chants of 'Ai Raja Udo Udo')

मंडळात मुर्ती व घटाची स्थापना :

देवी मंदिर, घरोघरी पहाटे सहा २० पासून ते दुपारी १०.५० पर्यंत घटस्थापना करण्यात आली तर, सायंकाळी सार्वजनिक दुर्गादेवी मंडळात मुर्ती व घटाची स्थापना करण्यात आली. शहरापासून जवळ असलेल्या वडेपुरी येथील रत्नेश्वरी देवी मंदिरात विश्वस्त मंडळाचे अध्यक्ष शिवाजी पाटील दळवे, सचिव साहेबराव झांबरे, सदाशिव अंबरे, सदाशिव स्वामी, दिलीपराव धर्माधिकारी, इतर विश्वस्त मंडळ मान्यवरांच्या उपस्थितीत सकाळी ११ वाजता माता रत्नेश्वरी देवीची घटस्थापना संपन्न होणार आहे. यावेळी देवीला अभिषेक, पुजा, आरती नंतर दर्शनासाठी भाविकांसाठी मंदिर खुले करण्यात आले. पहाटेपासून भाविकांच्या रांगा लागल्या होत्या. याठिकाणी संस्थानच्या वतीने दर्शन रांगांचे नियोजन केले होते. दर्शनाच्या वेगवेगळ्या रांगा बॅरिकेट लावून बनवण्यात आलेले आहेत, कुठल्या यात्रेकरूला कसला त्रास होणार नाही याची खबरदारी विश्वस्त मंडळ घेत आहे, अनेक ठिकाणी पिण्याच्या पाण्याची व्यवस्था करण्यात आलेली आहे त्याचबरोबर स्वच्छतागृहाची सुद्धा व्यवस्था या वर्षी करण्यात आलेली आहे. तर, गाडीपुरा व वामन नगरातील श्री रेणुकामाता मंदिर, जयभवानी नगर येथील तुळजा भवानी, काबरा नगर येथील महालक्ष्मी मंदिरात ही सकाळी दहा वाजेपर्यंत घटस्थापना करण्यात आली. अभिषेक, पुजा केल्यानंतर दर्शनासाठी मंदिर भाविकांसाठी खुले करण्यात आले होते. सर्वच मंदिरांची फुलांनी सजावट करण्यात आली होती.

पावसाच्या सरी, गुलालांची उधळण :

दुपारपासून सार्वजन‍िक मंडळांची गाडीपुरा, जुना मोंढा, वजिराबाद, कौठा आदीं ठिकाणच्या बाजारपेठेत दुर्गा देवीची मुर्ती घेण्यासाठी गर्दी झाली होती. ढोल ताशाच्या गजरात मिरवणूक काढून मंडळांनी मुर्ती व घटाची स्थापना केली. दरम्यान, पावसाच्या जोरदार सरी पडल्या. त्यामुळे मंडळाच्या सदस्यांची एकच धावपळ झाली. सदस्यांनी डोक्याला रिबीन बांधून जय माता कीचा जय घोष, गुलाल, फुलांची उधळण करून देवीचे स्वागत केले. सायंकाळपर्यंत जवळपास सर्वच ठिकणची मुर्ती स्थापना झाली होती. दरम्यान, कुठेही अनूचित प्रकार घडू नये, यासाठी जिल्हा पोलिस दलाच्या वतीने चोख पोलिस बंद बंदोबस्त ठेवण्यात आला होता.

पांढऱ्या साड्या, अनवानी तरूणाईने वेधले लक्ष :

नवरात्रोत्सवाला (सोमवार) आजपासून सुरूवात झाली. पहिल्या माळेला देवीला पांढऱ्या रंग प्रिय असल्याने महिलांनी या रंगाच्या साड्या परिधान केल्या होत्या. तसेच युवक, युवतींनीही नऊ दिवस चप्पल न घालता अनवानी चालण्याचा संकल्प केला. त्यामुळे ठ‍िकठिकाणी पांढऱ्या रंगाच्या साड्यांमधील महिलांचा समुह व अनवानी तरूणाई लक्षवेधून घेत होती.