महाराष्ट्र हेडलाईन : Nanded Bribe News : गलेलठ्ठ पगार असलेल्या एका तलाठ्याने दहा हजार रुपयांची लाच घेतली. त्याला 'एसीबी'च्या पथकाने रंगेहाथ पकडले आहे. (nanded naygaon tehsildar caught taking bribe successful action)
तक्रारदाराच्या वडिलांचे नावे असलेली शेती वारसा हक्काने ७/१२ वर नोंद करण्यासाठी दहा हजाराची लाच घेताना नायगाव तालुक्यातील कृष्णूर सज्जाच्या तलाठ्याला लाचलुचपत प्रतिबंध विभागाच्या पथकाने रंगेहाथ पकडले. अशोक दिगंबर गिरी (४६) असे संशयिताचे नाव आहे.
तक्रारदार यांची वडीलोपार्जित शेती मौजे कृष्णूर,( ता. नायगाव) येथे गट क्रमांक ११६,१४६, व ४०७ मध्ये २ हेक्टर २१ आर आहे. त्या शेतीची त्यांचे वडिलांचे नावे वारसा हक्काने ७/१२ वर नोंद करण्यासाठी तलाठी अशोक गिरीने त्‍यांच्याकडे २० हजार रूपयांची लाचेची मागणी केल्याची तक्रार ६ ऑक्टोंबरला एसीबीकडे केली होती.
पथकाने सापळा रचून घेतले ताब्यात :
दरम्यान, गुरुवारी (दि.९) विभागाने केलेल्या पडताळणीत नायगाव तहसील कार्यालयाच्या समोरील रस्त्यावर संशय‍ित आरोपी अशोक गिरी याने शासकीय पंचासमक्ष २० हजार रूपये लाचेची मागणी करून तडजोडीअंती दहा हजार रूपये स्विकारण्यास सहमती दिल्याचे निष्पन्न झाले आहे. दुपारी १.४२ वाजताच्या सुमारास पथकाने सापळा रचून वरील कामासाठी पंचासमक्ष दहा हजार रूपये लाच रक्कम स्विकारताना तलाठी अशोक गिरीला रंगेहाथ पकडले.
आधार कार्ड, पॅन कार्ड व मोबाईल जप्त :
गिरीच्या अंगझडती नगदी १६६० रूपये, आधार कार्ड, पॅन कार्ड व मोबाईल सापडला असून तो ताब्यात घेण्यात आला आहे. तसेच गिरीच्या घरची झडती घेण्याची प्रक्रिया उशिरापर्यंत सुरू होती. याप्रकरणी उशिरापर्यंत नायगाव ठाण्यात गुन्हा दाखल करण्यात आला.
