महाराष्ट्र हेडलाईन्स : Godavari flood : जिल्ह्यात मागील चार दिवसांपासून धरणातून होणाऱ्या विसर्गामुळे गोदावरी दुथडी भरून वाहत आहे. विष्णुपुरीचे प्रकल्पाचे १७ दरवाजे उघडण्यात आले असून २ लाख क्युसेक विसर्ग चालू आहे. दरम्यान, मंगळवारी रात्री जायकवाडीतून सोडलेले पाणी नांदेडमध्ये धडकणार होते. परंतु, बुधवारी दुपारी १ वाजेपासून वाढ होण्यास सुरवात झाली आहे. ३.५० लाख ते ४ लाख क्सुसेक्स विसर्ग नदीपात्रात वाहणार आहे. सदर विसर्ग २४ तास किंवा त्यापेक्षा जास्त वेळ राहण्याची शक्यता आहे. नांदेड शहरात गोदावरी नदीची इशारा पातळी ३५१ मीटर व धोका पातळी ३५४ मीटर आहे. सदरील विसर्गामुळे धोका पातळी ओलांडण्याची शक्यता आहे. त्यानुषंगाने नागरीकांनी संभाव्य उपाययोजना कराव्यात व तशी खबरदारी घ्यावी, असे आवाहन नांदेड पाटबंधारे मंडळाचे अधीक्षक अभियंता अ. आ. दाभाडे यांनी केले आहे. (Discharge of 3.50 to 4 lakh cusecs will continue in 'Godavari' for more than 24 hours; Possibility of exceeding the danger level..)

पुलावरील वाहतूक बंद :

नांदेड शहरासह जिल्ह्यात दोन दिवसांपासून पावसाने विश्रांती घेतली आहे. सर्व तालुक्यांमध्ये मंगळवारी जनजीवन सुरळीत झाली. नांदेड शहरातील खडकपुरा, गंगाचाळ, भीमघाट, नावघाट, मल्ली परिसर, बिलालनगर, पाकिजानगर, शंकरनगर, वसरणी या भागातील नाल्याकाठच्या वस्त्यांमध्ये पाणी शिरले. नदीची पातळी वाढल्यामुळे नावघाट येथील पुलावरुन पाणी जात असल्यामुळे दोन्ही बाजूने बॅरिकेड लावून पुलावरील वाहतूक बंद केली आहे. नांदेड तालुक्यातील मौजे निळा-तळणी, गाडेगाव व नवाघाट पुलावरील रस्ता बंद आहे. तसेच धर्माबाद तालुक्यातील शिरजखेड ते धर्माबाद रस्ता बंद आहे. दिग्रस या गावाला पाण्याचा वेढा होता पाणी सध्या कमी झाले आहे. गावकऱ्यांना बाहेर येण्यासाठी पायवाट आहे. मनपाच्या तात्पुरत्या निवारा केंद्रात सध्या ६०० पूरग्रस्त आहेत.